Va unos díes que se cumplió un añu de la presentación oficial de Grana, n’Alcordanza de Yolanda Huergo. A lo llargo d’estos 12 meses tamos contentos con toles actividaes que llevamos alantre, pero sobre too préstanos muncho’l piñu de persones que fuimos a xuntar como socies y collaboradores.
El 24 de setiembre del añu pasáu presentóse na sala de prensa del Ayuntamientu de Xixón Grana, n’Alcordanza de Yolanda Huergo, l’asociación que nació inspirada nel exemplu que nos dexó l’amiga, la militante y la persona enfotada nun futuru meyor pa les persones que viven n’Asturies y fuera d’ella.
Nel mes de payares yá pudimos entamar les primeres xornaes Sobre(vivir) n’Asturies Presente y futuru del territoriu y la so población nes que pudimos ver un bon análisis y debate sobre cómo organizar Asturies en materia d’ordenación del territoriu.
En xunu pudimos entamar en collaboración cola Sociedad Cultural Gijonesa una mesa redonda alrededor d’un llibru que ta dando muncho que falar y pensar, escritu pol compañeru de Grana, David Guardado, Nunca vencida «Una historia de la idea d’Asturies». La mesa llamóse «La idea d’Asturies: pasáu, presente y futuru» y puedes ver la grabación de la mesma nesti vídeo.
Nel mes de febreru convocamos la primer edición del I Premiu Yolanda Huergo que busca afalar el debate, l’intercambiu d’idees y la creación de conocimientu n’Asturies. El plazu pa la presentación de trabayos acabó nel mes de xunu y quedamos mui satisfechos cola cantidá de persones que se presentaron y esti mesmu mes vamos saber el nome del trabayu ganador.
Arriendes d’estes actividaes divulgatives, Grana tamién tuvimos qu’amosar el nuestru compromisu cola defensa de la llingua asturiana y la llibertá d’espresión sumándonos al manifiestu que se publicó en Xixón escontra la esclusión del asturianu de la porgramación festiva xixonesa y pola defensa de la llibertá d’espresión. Tamién collaboramos na presentación d’una moción en defensa de la cultura asturiana y contra la censura.
Como vos dicíamos, esti mesmu mes vamos dar anuncia del trabayu ganador del Premiu Yolanda Huergo, vamos facer la nuestra I asamblea anual y dalguna actividá más de la que vos informaremos d’equí a poco.
Pero de tolo que ficmos estos meses lo que más nos presta ye la cantidá de xente que s’apuntó como socia y collaboradora. Sabíemos que Yolanda diba yera una idea que sirvía pa xuntar, p’atropar voluntaes y que con elles podemos construyir dalgo bien guapo.
A toles persones que yá nos sofitáis, munches gracies, y a les que quieran facelo podéis informavos equí.