Va unes selmanes Grana firmamos un manifiestu en defensa de la música n’asturianu y contra la censura. El testu redactóse por culpa de les declaraciones de la conceyal responsable de festexos de Xixón nes qu’anunciaba un vetu a tolos que defendieran la oficialidá del asturianu. La plataforma «Música n’asturianu SÍ», promotora del manifiestu, decidió presentar una moción nel ayuntamientu pa que’l plenu del Conceyu se posicionara sobre esta cuestión, y esti martes 1 de xunetu la moción foi aprobada por casi unanimidá, colos votos de PSOE, FORO, PP, IU-Convocatoria por Xixón y Podemos, con solo’l non de VOX.
En Grana, n’Alcordanza de Yolanda Huergo tamos contentos de poder collaborar con iniciatives d’esti tipu, manifestándonos en defensa de la llibertá d’espresión, los derechos llingüísticos de les asturianes y asturianos y pola promoción de cultura asturiana. Si queréis saber más detalle convidámosvos a que visitéis esta noticia del dixital Nortes.