¿Por qué Grana?

La inspiración que nos dexó Yolanda Huergo llévanos a trabayar por construyir una Asturies y un mundu meyor

“La grana azul del futuru y la flor de l’alcordanza.”

Esta frase d’un cantar del grupu Felpeyu escrita por Fernando Álvarez-Balbuena recueye en si mesma muncho de la motivación, la escusa y la razón pola qu’un grupu de persones deicidió entamar Grana, n’Alcordanza de Yolanda Huergo.

Primero de nada, l’alcordanza, inevitable pero tamién irrenunciable señaldá que nos entra cuando nos alcordamos de l’amiga, la compañera, l’activista, la militante…etc.Pero decatámonos de qu’esta señaldá llegónos en forma d’enerxía, non como dalgo paralizador, y ye ehí cuando nos fixamos na otra parte del los versos, na grana azul del futuru.

A lo llargo los años Yolanda Huergo desenvolvió una actvidá intensa de compromisu colo cercano y lo llonxano, colo grande y colo pequeño. La pelea pol reconocimientu de los derechos llingüísticos n’Asturies, la defensa de los derechos humanos, la xusticia social y la protección dell mediu ambiente fueron guíes de trabayu que la inspiraron, y sirven de guía pal trabayu que queremos desendolcar nesta asociación. Y anque yá nun tea con nós, sí nos quedó una parte d’ella en forma d’inspiración que vamos querer y protexer, y de la que nos vamos a aprovechar nel meyor sentíu de la palabra.

Ye por eso que, los promotores d’esta asociación creemos que tanto n’Asturies como nel restu del mundu sigue faciendo muncha falta xente comprometío que faiga por un mundu meyor. Pero tamién faltan idees o dalgunes nun tienen la resonancia que tendríen que tener. Asina, nun mundu tan cambiante como esti, dende Asturies y l’asturianismu d’izquierdes nel que nos inspiramos ye especialmente importante reflexionar sobre ónde tamos y pa ónde queremos dir como país, como pueblu. Esta la principal aportación que queremos facer dende l’asociación, semar grana de debate y reflexión pa que podamos saber y actuar sobre una Asturies que quier y necesita reconocese, querese y creéselo.

Esta xera de sirvir d’espaciu d’alcuentru y debate queremos facelo al traviés de la organización de xornaes, meses redondes, charres y toles formes posibles d’intercambiu d’idees y propuestes.

Dende l’asociación tamién queremos premiar la investigación n’Asturies y n’asturianu, premiar el conocimientu que se crea n’Asturies. Poro, creamos el Premiu Yolanda Huergo que se concederá de manera bienal.

Too esto queremos facelo col trabayu de les persones que somos impulsores d’esto, pero tamién col sofitu de toos aquellos que quieran facese socios de Grana. Nun podemos entender dalgo inspiráu en Yolanda que nun seya dende lo colectivu, onde ente toos garramos esa enerxía que nos dexó pa siguir el camín pa que seguru, al final, volvamos a alcontranos con ella.