Yolanda Huergo

«Yolanda Gozález Huergo dedicó la so vida, les sos fuerces y la so enorme capacidá de compromisu a buscar un mundu meyor, una Asturies más xusta consigo mesma y coles persones que nella viven. «

Yolanda González Huergo naz el 30 de mayu de 1971 en Xixón. La so infancia desenvuélvese na parroquia de Roces, concretamente nel Pobláu, nes cases que construyeron no que se llamó’l barriu de Nuestra Señora de Covadonga pa trabayadores de los astilleros y el ferrocarril de Llangréu. 

Un barriu de clase trabayadora onde Yolanda echa los sos primeros años viendo la evolución d’esi Xixón y de les persones que compartíen con ella barriu, vivencies y preocupaciones típiques de les persones que ellí vivíen. Tres d’estos primeros años llega la hora avanzar nos sos estudios, y gracies a les beques que va consiguiendo a lo llargo de los años, como muncha xente de la so xeneración, matriculase y llicénciase en derechu na Universidá d’Uviéu.   

Pero mientres avanza la vida en Xixón de Yolanda, paralelamente hai otra vida que se fae n’Argüeyes, Siero, que ye d’onde vien la parte materna familiar y onde viven los sos güelos. Ellí Yolanda pasa bona parte de los branos y echa bien de tiempu colos sos güelos y los sos primos nesi ambiente rural. Ellí la importancia del mediu natural, pero sobre too, la importancia de ser conscientes del llegaú marca tamién bastante la forma d’entender la vida de Yolanda.

 Con esa mezcolanza de vivencies ye cuando Yolanda Huergo, yá na veintena, entama a echar una mano en coses qu’ella considera que paguen la pena, en coses nes que la inxusticia rescampla. Asina, entama a militar n’Amnistia Internacional, convirtiéndose col tiempu en coordinadora de Xixón y vicepresidenta d’Asturies. La so preocupación pola inxusticia que se vive n’Asturies alrodiu l’idioma cristaliza n’entrar a militar na Xunta pola Defensa de la Llingua Asturiana. Ehí son munchos años de trabayu, manifestaciones, conciertos pola oficialidá y recursos y demás papel llegal onde Yolanda trabaya abondo por tener formación en derechu.

 Col tiempu, sumando esperiencia vital a base de militar, Yolanda Huergo va decatándose de que muches de les preocupaciones que tien poles coses que la rodeen y pol país nel que vive necesiten d’un espaciu políticu propiu, autónomu, y entama a militar en IAS, Izquierda Asturiana. Esti primer pasu na militancia política centróse n’intentar construyir una alternativa política asturiana dende asturianismu políticu d’izquierdes.

 A lo llargo los años Yolanda, y muncha xente que militó con ella, echó bien d’hores trabayando na dirección de xuntar a persones que pudieren compartir una visión de les necesidaes d’Asturies y les sos soluciones. Asina, d’IAS pasó a Unidá Nacionalista Asturiana, que xuntaba militantes vinientes d’Izquierda Asturiana y Andecha Astur. Posteriormente, pa les elecciones autonómiques de 2011, entámase una coalición electoral col Bloque por Asturies onde Yolanda Huergo ye la nº 2 de la llista.

Ente 2012 y 2018 Yolanda Huergo desactiva la so miltancia política, centró la so actividá nes causes sociales, na militancia na llucha pola oficialidá de la llingua asturiana hasta que’l movimientu 15M convulsiona la política n’España y n’Asturies creando nuevos espacios. Adulces Yolanda avérse a la espresión política del 15M, Podemos, y Podemos avérase a Yolanda. En 2018 Yolanda Huergo pasa a formar parte de la dirección local de la organización y en mayu de 2019 Yolanda ye la cabeza de cartel de la colación Podemos-Equo Xixón algamando 3 conceyales. Yolanda Huergo foi la portavoz de grupu municipal hasta’l 6 d’agostu de 2020 cuando fallece por mor d’un cáncanu del que llevaba tratándose años.

 Yolanda Gozález Huergo dedicó la so vida, les sos fuerces y la so enorme capacidá de compromisu a buscar un mundu meyor y una Asturies más xusta consigo mesma y coles persones que nella viven.