II Premiu Yolanda Huergo pa trabayos d’investigación n’asturianu

Ún de los oxetivos principales de l’asociación “Grana, n’Alcordanza de Yolanda Huergo” ye afalar el debate, l’intercambiu d’idees y la creación de conocimientu n’Asturies. Por ello, Grana ta acabante convocar esta segunda edición del Premiu Yolanda Huergo, que quier reconocer obres inédites de cualesquier ámbitu del conocimientu y llínia d’estudiu escrites o traducíes al asturianu.

La dotación del premiu ye de 1.500 euros y Grana afalará la publicación del trabayu premiáu. Les obres, con un mínimu de 80 fueyes, tienen qu’unviase enantes del 1 de xunetu de 2025 a la dirección email info@asociaciongrana.com. Les bases competes pueden consultase na web de l’asociación.

N’anterior edición resultó premiada la obra “Los cuartos propios de la lliteratura asturiana: una conversación colectiva”, trabayu presentáu por Inaciu Galán nel que s’afonda sobre la lliteratura n’asturianu fecha por muyeres y que sedrá asoleyáu nos próximos meses.

BASES 

D’acordies a estes bases convócase’l II Premiu Yolanda Huergo pa trabayos d’investigación n’asturianu. 

1ª. Pueden presentase trabayos d’investigación de cualesquier estaya de conocimientu y llinia d’estudiu. 

2ª. Los trabayos han presentase n’asturianu, siendo estos orixinales o traducíos a esti idioma. Habrán de ser inéditos y non premiaos n’otros concursos. Nun podrá participar el ganador/a de l’anterior edición d’esti premiu.

3ª. Los trabayos presentaos habrán de tener una estensión mínima d’ochenta páxines, escrites con doble interlliniáu, tipu lletra Arial o asemeyada y tamañu 12. Al tiempu tendrán de tar escritos cola cadarma metodolóxica y conclusiva propia de los trabayos d’investigación, siendo coherentes con aspectos formales normalizaos pa esti tipu de trabayos no tocante al índiz, bibliografía o citación.  

4ª. El Xuráu valorará la orixinalidá académica, la calidá metodolóxica de la investigación y la so relevancia científica y social. 

5ª. Los trabayos deben presentase baxo alcuñu y habrán unviase, enantes del 1 de xunetu de 2025, a la dirección email info@asociaciongrana.com nun archivu pdf col títulu del trabayu. N’otru pdf nomáu plica_títulu del trabayu habrá unviase los datos personales (nome, apellíos, dirección, email, númberu de contactu, DNI y una breve biografía del autor/a). 

6ª. El premiu ye de 1.500 € suxetos a les retenciones pertinentes y puede ser únicu o compartíu si asina lo decide’l Xuráu, que tamién puede declaralu ermu. 

7ª. L’asociación Grana va afalar la publicación del trabayu premiáu. L’aceptación del premiu per parte del autor/a implica la renuncia a los derechos d’edición parcial y total del trabayu premiáu. 

8ª. El xuráu tará formáu por: 

• Representante, rotatoriu, de l’asociación Grana. 
• Secretariu de l’asociación Grana (ensin votu), que llevantará acta de la sesión de deliberación del xuráu. 
• Una persona, escoyída pola asociación, pola so solvencia investigadora y valir académicu. 
•  El ganador/a de la edición anterior d’esti premiu.
• Representante de la editorial.

El so veredictu sedrá inapelable. 

9ª. L’autor premiáu comprométese a asistir, salvo causa de fuerza mayor, a la ceremonia d’entrega del premiu. 

10ª. Toles persones que presenten los trabayos comprométense a aceptar estes bases.

(*) CLAÚSULES PROTECCIÓN DE DATOS  

En cumplimientu de lo afitao na llexislación vixente en materia de protección de datos, el Regla mentu (UE) 2016/679 del Parlamentu Européu y de Conseyu de 27 d’abril de 2016 (RGPD), na Llei  34/2002, de 11 de xunetu, de Servicios de la sociedá de la información y comerciu electrónicu (LSSI CE) y otres disposiciones dictaes nel so desarrollu, los datos facilitaos pol participante pente l’envíu  voluntariu de los datos personales, sedrán responsabilidá de l’Asociación Grana cola finalidá de  xestionar la convocatoria, desarrollu y celebración del concursu, acordies colo afitao nes bases del  mesmu. Esti tratamientu de datos ye necesario y vusté consiente espresamente’l tratamientu de los datos personales como participante.