El xuráu del II Premiu Yolanda Huergo pa trabayos d’investigación n’asturianu entamáu pola asociación Grana, n’Alcordanza de Yolanda Huergo, y formáu por Esther Prieto, Boni Pérez, Inaciu Galán y Xosé Anxelu Gutiérrez Morán, y actuando como secretariu Pablo Rodríguez Alonso, acordó conceder por unanimidá’l premiu a la obra “¡Da-yos caña! El tiempu y el contestu d’una banda de rock astur”. Abierta la plica, l’autor del trabayu y ganador del premiu foi Xune Elipe.
El xuráu quiso rescamplar del trabayu premiáu’l so valir testimonial y l’análisis que recueye del contestu cultural, políticu-ideolóxicu y sociueconómicu nel que surdió una de les formaciones musicales más importantes de les últimes décades n’Asturies.
L’actu d’entrega del premiu tendrá llugar nel Muséu Casa Natal de Xovellanos de Xixón el vienres 12 d’avientu a les 18:00.
El ganador, Xune Elipe Raposo (Avilés, 1962), foi fundador del grupo de rock Dixebra en 1987, grabando hasta’l momentu una quincena de discos y actuando n’infinidá de festivales n’Asturies y fuera d’ella, con una llarga y esperimentada carrera sobre los escenarios, y creador del sellu Discos L’Aguañaz en 1992, editando hasta’l momentu más de setenta referencies de tou tipu en llingua asturiana.
Xune Elipe ta venceyáu dende bien mozu al mundu de la comunicación, tanto en radio como en prensa y televisión: organización y dirección del I, II y III Día de la Radio n’Asturianu (Radio Popular de Avilés, 1983-84-85) o responsable de la sección La Fueya’l Carbayu (La Voz de Avilés, 1982-83-84). Fundador y director del Anuariu de la Música Asturiana dende l’añu 2000. Director y presentador del programa “El Club Musical” de TPA (2013-2014), dedicáu a la escena musical asturiana. Director y presentador del programa “Qué facer” de RPA (2013). Informativu d’ociu y tiempu llibre n’Asturies. Director y presentador del programa “Al Son” de RPA (2020-actualidá), dedicáu a la música d’espresión asturiana. Productor del programa “Nel cantu la memoria” de TPA (2016-2017) sobre la música popular n’Asturies. Productor, director y guionista de la serie “D’ayeri a güei” de TPA (2020) sobre la historia de la música asturiana dende qu’hai rexistros sonoros.
Ye asimesmo autor de les obre “Llingua y rock” (AYDA, 1996), trabayu sobre les bandes de rock qu’emplegaron l’asturianu nes sos composiciones; “Rockmería”, un repasu a la música popular del sieglu XX (Publicaciones Ámbitu, 2009), compendiu sobre los principales estilos y tendencies musicales de los últimos cien años; “Dende la Casa Conceyu” (Somos Avilés, 2019), recopilación d’artículos periodísticos; y “Hai una llínia trazada. Historia de la música asturiana” (Trabe, 2022), XXVI Premiu «Máximo Fuertes Acevedo» d’Ensayu 2020.
Ún de los oxetivos principales de l’asociación “Grana, n’Alcordanza de Yolanda Huergo” ye afalar el debate, l’intercambiu d’idees y la creación de conocimientu n’Asturies. Por too ello, Grana convocó esta segunda edición del Premiu Yolanda Huergo, que quier reconocer trabayos d’investigación de cualesquier estaya de conocimientu y llínia d’estudiu fechos o traducíos al asturianu.
La dotación del premiu ye de 1.500 € y l’asociación afalará la publicación del trabayu premiáu. Pol so carácter biañal, el III Premiu Yolanda Huergo pa trabayos d’investigación n’asturianu convocaráse nuevamente en 2027. Dende l’Asociación Grana queremos agradecer a tolos autores qu’unviaron los sos trabayos, asina como invitar a toles persones interesaes a mandar les sos obres d’investigación pa la próxima edición del premiu.