Yá ta na cai y espublizáu pola editorial Trabe «Da-yos caña. El tiempu y el contestu d’una banda de Rock Astur», escritu por Xune Elipe.
Nel llibru tán presentes campos lliterarios y temáticos estremaos: historia, política, música o biografía danse la mano nun testu que se centra nes circunstancies y socedíos más importantes, a nivel asturianu y internacional, que posibilitaron el surdimientu d’un grupu como Dixebra nuna ciudá como Avilés. Nesti sen, tener conocencia de la crisis del petróleu nos años 70, de la llegada de la democracia formal, del nacimientu del asturianismu contemporáneu, de la reestructuración del sector industrial, de la llegada del punk, de los medios alternativos de comunicación, del descubrimientu del nacionalitarismu llibertariu, del impactu de les drogues, del ambiente urbanu, de los conflictos llaborales, de la instauración del réxime autonómicu, del procesu de normativización del asturianu… va danos les claves de los porqués surde una formación musical como Dixebra y qué repercusión va tener too ello na so ideoloxía y mensaxe.
Yá podéis mercalu nes llibreríes y na propia web de Trabe.