El vienres 1 d’avientu entregamos nel Muséu Barjola de Xixón el I Premiu Yolanda Huergo. Inaciu Galán recoyó’l premiu énte la presencia de socies, socios, muncha xente conocío amás d’autoridaes del Conceyu de Xixón, Noelia Ordieres d’IX, Jesús Martínez de Foro, Ramón Tuero del PSOE y Olaya Suárez de Podemos.
L’actu entamó con una pieza del musicu Xel Pereda, que foi quien punxo música tamién al pieslle del actu. Naciu Varillas, presentador de la entrega, foi dando pasu a les distintes personesn qu’intervinieron nél. Pirmero Carla Huergo, familiar de Yolanda y creadora de la pieza del premiu. una figura que xuega con la flor del tarriellu y unos motivos que recuerden a los pieslles d’una casa familiar d’Argüeyes (Siero) onde Yolanda pasó bien de tiempu colos sos güelos.
De siguío, Pablo Rodríguez Alonso, secretariu del xuráu del premiu, lleó l’acta que concedía’l galardón a Inaciu Galán que lleó un discursu mui prestosu nel que facía rescamplar lo emocionante que yera pa él recibir esti premiu, yá que conoció y almiraba a Yolanda, arriendes de describir les principales característiques del trabayu col que ganó, “Los cuartos propios de la lliteratura asturiana: una conversación colectiva”.
L’actu siguió con unes pallabres de la presidenta de Grana, Iris Díaz, nes que fizo un repasu a toles actividades del añu y les espectatives pal añu qu’entra, agradeciendo a los socios y socies el so sofitu y animando a la xente axuntase alredor d’esti proyectu. El pieslle musical púnxolu otra vuelta Xel Pereda emocionando a tol mundu cantando dos temes de les bandes de folk más importantes de la escena musical asturiana, Llan de Cubel y Felpeyu, «El Cantar del Ayerán que perdió la guerra» y «Los Fayeos de Mayo», que tanto y prestaben a Yolanda.
