Grana, n’Alcordanza de Yolanda Huergo volvimos a echar un gabitu pa denunciar cuando dalguién ataca la dignidá y derechos de los falantes de la llingua asturiana, arriendes de pidir consensu y altura de mires p’avanzar na normalización de la llingua asturiana y respetar a toles artistes qu’usen l’asturianu y/o tán a favor de la oficialidá de la mesma.
Les declaraciones del conceyal non adscritu y presidente de Divierta, Óliver Suárez, volviendo a poner enriba la mesa posibilidá de discriminar a artistes na programación del Conceyu de Xixón pol fechu d’usar o defender l’asturianu, fizo que’l grupu municipal d’IX plantegara al plenu la reprobación del conceyal. Nesi contestu Grana, en collaboración con otros firmantes del manifiestu Música n’Asturianu Sí, xestionamos la presencia de Xosé Antón Fernández «Ambás» nel plenu pa denunciar estes declaraciones, esclariar la so gravedá y pidir acción por parte del equipu de gobiernu pa torgar cualesquier tipu de discriminación, por acción u omisión.
La intervención d’Ambás tuvo una parte que podemos llamar más política y otra parte más personal que ta teniendo muncha repercusión que podéis ver equí, nel canal de Youtube de Música Asturiana.